Kisah Batangsa Kawin

Baisian anak bibinian ujar urang banyak was-wasnya. Harus bujur-bujur dijaga, apalagi amun nang anak sudah ganal wan sudah tahu lawan lalakian alias sudah manganal wan nang ngarannya cinta.

Kaya itu jua bini Palui. Inya setengah mati mahagai Puput, anaknya nang lagi naik bujang.

Kaya apa kada takutan, amun anaknya itu handak satiap hari batangsa kawin.

“Ulun Ma ai handak jua kaya kakawalan, samunyaan sudah balaki awan baanakan,” ujar puput bapadah wan umanya.

Takipik jua bini palui mandangar papadahan anaknya itu. “Uma ikam inilah, hanyar tamat SMA, sudah kamimiyangan handak balaki. Baluman waktunya lagi ikam nak ai, kaina-kaina hulu. Kuliahkah hulu kaya si Endang anak amang Tuhirang, atawa bagawi kaya si Tuti anak amang tulamak,” ujar umanya sarik.

Anak Palui nang bangaran si Puput ini dasar sudah tahu behodengan tumatan lawas pang. Inya parak banar dengan si Husin Jabuk, kawalnya tumatan SMP. Sudah sarantang-saruntung nangkaya laki bini, kamana ada Puput di situ ada Husin Jabuk. Malihat kalakuan anaknya bini Palui takutan banar, gaer amun kaina tajadi napa-napa.

“Bingung jua aku abahnya ai, inya handak banar sudah pinanya balaki. Aku kadanya kada satuju pang, tapi Ikam tahu sorang kalo, si Husin itu sampai wayah ini baluman sing gawian, kaya apa mambari makan anak-bini,” ujar Bini Palui bakesah wan Palui.

“Amun dasar jodohnya handak diapai pulang,” ujar Palui.

Baisukannya wayah bini Palui haur baharaguan di dapur, kada lawas datang pulang Puput baparak.

“Ma malam tadi ulun bemimpi dipatuk ular Ma ai di batis kanan. Ujar kakawalan ulun amun mimpi dipatuk ular itu patanda parak basanding,” ujar Puput supan-supan.

“Bujur haja ujar kakawalan ikam itu. Tapi ujar urang tuha bahari amun mimpi dipatuk ular di batis kanan itu baluman lagi, apalagi amun kadada badarah, artinya balum wayahnya ikam kawin,” sahut bini palui.

Puput tahinip. Sambil inya mamikirakan jawaban nang tapat.

“Anu Ma ai,” ujar Puput basumangat. “Habis ulun dipatuk ular di batis kanan, kada lawas ularnya mamatuk pulang ka nang kiwa. Bujur pang partamanya kada badarah, imbah itu ulun picik-picik bakas igutannya itu, sakalinya kaluar Ma ai darahnya, banyak banar lagi,” ujar Puput baampik kasukaan.

“Munyak ikam ini, sudah kaina ikam kukawinkan haja. Kaina aku padahakan awan abah ikam,” ujar bini Palui sarik maraga kakalahan. “Kada abah kada anak kalakuannya sama, mahaluya wan banyak akalnya,” ujar bini Palui gagarunum saurang.