Kisah Ajaran Asgrib

Palui wan kakawalannya tulakan ka pasar ganal. Asing-asingnya bacari napa nang dikahandaki. Garbus bacari sandal, sadang Tulamak tuhuk bakikih salawar. Napa gasan ukuran pinggang kaya Tulamak itu mimang ngalih banar cariannya. Palui manukar kupiah. Napa nang tadahulu itu sudah bakarak wan babau hapak. Amun talawas diandak kada dipakai pasti dihurung lipas.

“Kaya apa Lui kupiahnya? Nyaman hajakah dipakai?” ujar Tulamak manakuni.

“Alhamdulillah pas banar, rajakinya lagi kada lawas aku dapat saruan di kampung sabalah, jadi mamugai langsung”, ujar Palui kahimungan.

“Ikam ni kada lain nang dipander urusan parut, sambahyang kada tapi diurus”,  ujar Garbus manumpalak.

“Jangan mahina, aku biar di mana wan sibuk napapun tatap ingat sambahyang”, jar Palui mambila diri.

“Ingat haja, tapi kada manggawi,” ujar Garbus manyambung.

“Inya umpat aliran sasat,” ujar Tulamak jua

“Ayu ja ikam badua manang. Tapi jadi kalo kamarian ka rumah mangganii maulah kurungan hayam?” ujar Palui batakun

“Insya Allah mun kada hujan,” jar Tulamak.

Sakitar jam 5 labih kamarian Tulamak wan Garbus bajalan manuju rumah Palui.

“Syukur buhan ikam datang, aku kira kada jadi,” ujar Palui.

“Kada nyaman lawan janji Lui ai, asa bahutang,” jar Tulamak langsung umpat manggawi kurungan hayam.

“Amun baanak ayam Bangkok ingatakan Lui lah, aku badahulu dapat anaknya,” jar Tulamak.

“Aku jua,” jar Garbus jua.

“Beres haja buhannya-ai”, ujar Palui.

Kaasikan bagawian, pina nyaring bini Palui bakiau.  “Ui abahnya, hari pina sanja, parak magrib, sudahkan pian sambahyang Asar”, bini Palui bakuciak.

“Satumat lagi umanya ai, tanggung nah”, jar Palui kada heran-heran.

“Badosa abahnya ai karancakan malambatakan sambahyang”, jar nang bini lagi.

“Aku kira tadi sudah sambahyang Palui nangini”, ujar Garbus umpat jua manimpali

“Aku ni mahir ja sudah umpat ajaran ASGRIB, jadi kadapapa”, jar Palui pina santai.

“Ajaran ASGRIB? napa pulang Lui?” takun Garbus.

“Ajaranku jua ai, ASGRIB tu artinya sambahyang Asar wan Magrib kugabung,  Mun Zuhur wan Asar bagabung ngaran ajaran JUHSAR”, jar Palui mangalakak tatawa

“Aku kada umpat mun gawian ajaran sasat, damintu,” jar Tulamak.